Оқу жоспарының вариативті бөлігінің білім мазмұнын таңдап алуда басшылыққа алынатын принциптерді

Жалпы білім мазмұнын таңдап алу – аса маңызды әрi күрделі мәселе. Педагогикада бiлiм мазмұнын құру тәрізді әдiснамалық және жалпытеориялық проблемаларды зерттеуде дидактикалық негiздеме бола алатындай теориялық тұжырымдамалар жасалған. Осы бiлiм мазмұны теориясының кейбiр қағидаларын қолданбалы курстардың мазмұнын таңдап алуда басшылыққа алу қажет.

Орта бiлiм мазмұнының бiрыңғай деңгейiнiң тұжырымдамасында (В.М.Монахов) бiлiм мазмұнын таңдап алудың қажеттi шарты ретінде бiлiм берудiң мақсатын айқындау және оны нақтылау алынады және оның мынадай иерархиясы берілген:

1) қоғамның жасөспірімдерді оқыту мен тәрбиелеуге қоятын әлеуметтік тапсырысы ретіндегі мемлекеттік мақсат;

2) оқу жоспары мен оқыту бағдарламаларының құрылымында көрініс табатын оқушы сұранысы ретіндегі жалпы білім беру мақсаты;

3) жалпы білім беретін пәндердің мазмұны арқылы жүзеге асырылатын білім беру қызметі ретіндегі оқыту мақсаты.

Бұдан мектептің жоғары сатысының вариативті компоненттің білім мазмұнын таңдап алу пәнаралық кіріктіру, жүйелілік, тұтастық, аяқталғандық, модульдік принциптерімен қатар, үш таған деп айтуға болатын мынадай маңызды принциптерге негізделуі қажет екені шығады:

1. Қолданбалы сипатта болуы

2. МЖМБС-қа сәйкес болуы

3. Мамандыққа бағдарлауы

Сөйтiп, мазмұнға жалпы бiлiм беру мақсаты үшiн керектi материалды таңдап алу қажеттiгi туралы идея ешкiмде күмән туғызбайды. Алайда, бұл мазмұн мектеп бітірушілерге ғылым негiздерiнен бiлiмдi әрі қарай үздiк жалғастыруға, өздiгiнен бiлiмiн көтеруге және практикалық қызметке араласуға жеткiлiктi болуға тиiс. Осы жалпылама қағидалардан бiлiм мазмұнын қалыптастырудың принциптерi мен оқу материалын таңдап алуға, теориялық және практикалық сипаттағы материалдың арақатынасына қойылатын және оқу бағдарламаларын құрастыруда белгiлi бағдар болуы мүмкiн талаптарды ажыратып алуға болады.