Мұғалжар ауданының қалыптасуы

Ақтөбе қаласының іргесі Ақ-төбе қамалы ретінде (ескі жылнама бойынша 1869 жылғы 9 мамыр) қаланғаннан кейін біздің өлкемізге де қоныс аударушылар ағыла бастады. Ақтөбе маңында құнарлы жер бар, және жергілікті тұрғындар диқаншылықпен шұғылданбайды деген қауесет Ресейдің орталық губернияларының шаруалары арасында тез тарап кетті. Бірақ қоныс аудару процестерінің ең басты себебі бұл – патшалық Ресейдің саясаты болды. 1878 жылдан бастап Рязань, Воронеж және Тамбов губернияларынан Ақтөбе жеріне қоныс аударушылар келе бастады [3, 102-б.].

1901-1905 жылдары Орынбор-Ташкент теміржолының құрылысы басталды. Соның нәтижесінде Ақтөбе облысының территориясында халық санының артуына байланысты әкімшілік –аумақтық құрылымдарында өзгеріс бола бастады.

1965 жылы 17 желтоқсанда Ақтөбе облысының құрамында жаңа [4, 157-б.] аудан Қандыағаш деген атаумен құрылып, орталығы ретінде Ембі қалалық поселкесі белгіленді. Қандыағаш ауданының құрамына Темір ауданының құрамында болған ауылдық елді-мекендер Бақтыөзен, Бөрлі, Егіндібұлақ, Еңбекші, Жұрын, Құмжарған, Орқаш, Шилі, және Ембі ауылдық кеңестері мен Шалқар ауданының [4, 201-б.] Мұғалжар ауылдық кеңесі [4, 203-б.] қосылды.

Содан кейін, 1997 жылдың 16 маусымында Қазақстан Республикасы Президенті Н.Назарбаевтың Ақтөбе, Батыс Қазақстан, Қызыл-Орда және Қостанай облыстарының әкімшілік-аумақтық құрылымына өзгеріс енгізу туралы [5, 312-б.] өкімімен Октябрь ауданы Мұғалжар ауданы, ал оның орталығы Октябрь қаласы – Қандыағаш қаласы болып өзгертілді [5, 313-б.].