Өзін-өзі бақылауға арналған сұрақтар

1. 
   Дисперсті жүйелерде броундық қозғалыс қалай жүреді?
   
2. 
   Дисперсті жүйелердегі осмостық қысымның ерекшелігі неде?
   
3. 
   Дисперсті жүйелердегі диффузияның ерекшелігі неде?
   
4. 
   Седиментация үрдісін сипаттаңыз. Дисперстік бөлшектің шөгу жылдамдығының теңдеуін жазып, оның орындалу шарттарын атаңыз.
   
5. 
   Дисперсті жүйенің седиментациялық-диффузиялық тепе-теңдігін сипаттаңыз.
   

Коллоидтық жүйелердің оптикалық қасиеттерінің ерекшеліктері олардың негізгі қасиеттеріне – гетерогенділік пен дисперстілігіне байланысты. Фазааралық бөліну беті жарықтық, электрондық, иондық және т.б. сәулелердің бағытын өзгертеді. Сонымен қатар жанасқан фазалар осы сәулелерді біркелкі жұтпайды (өткізбейді). Дисперсті жүйелер фазалық біртекті емес, сондықтан олардың оптикалық қасиеттері де бірдей болмайды. Микрогетерогенді және дөрекі дисперсті жүйелерге қарай бағытталған сәулелер бөлшектердің бетіне түсіп, одан шағылысып немесе сынып әртүрлі бағытта жүйеден шығады. Сәулелердің дисперсті жүйеден түзу өтуіне олардың бөлшектен бөлшекке өткенде көп есе сынуы мен шағылысуы кедергі жасайды. Нәтижесінде дисперсті жүйеден шыққан сәулелердің қарқындылығы бастапқыдан аз болады. Дисперстік фазаның концентрациясы мен дисперстілігі неғұрлым үлкен болса, соғұрлым жүйеден шыққан жарықтың қарқындылығы да аз болады. Дисперстіліктің артуы сәулелердің дифракциялық шашырауына (опалесценцияға) әкеліп соғады.