Лекция Материалық нүктенің кинематикасы. Кіріспе. Физика пәні және оның басқа ғылымдармен байланысы. Физикалық шамалардың өлшемділігі және өлшеу бірліктері

Түзусызықты, қисықсызықты, шеңбер бойымен бірқалыпты, бірқалыпты айнымалы немесе айнымалы қозғалыстарды сипаттайтын кинематикалық параметрлер мен қозғалыс теңдеулерін білудің теориялық және практикалық маңызы өте үлкен. Мысалы, қозғалыстағы белгісіз объектіні атып түсіру үшін оның қозғалыс траекториясын, сызықтық немесе лездік жылдамдықтары мен үдеулерін білуіміз керек. Оның жылдамдығы координатасымен уақыты электромагниттік толқын арқылы анықталып, қалған параметрлері белгілі формулалар арқылы есептеледі. Объектіні сипаттайтын кинематикалық параметрлерге сәйкес, оқтың траекториясы таңдап алынады. (Оқтың бастапқы жылдамдығы, горизонтпен жасайтын бұрышы, т.с.с.). Сонымен қатар жұлдыздар мен планеталардың қозғалыс траекторияларын немесе олардың өз осьтерінен айналу қозғалыстарын сипаттайтын параметрлерді білу арқылы ғалымдар атмосферадағы, мұхиттар мен теңіздердегі құбылыстарға, жыл мезгілдерінің, күн мен түннің ауысуларына, ауа райының өзгерістеріне белгілі бір болжамдар жасай алады. Табиғатпен техникадағы кездесетін қозғалыстардың басым көпшілігі айналмалы периодты қозғалысқа жататындықтан, оларды математикалық тұрғыдан зерттеп, физикалық мағыналарына талдау жасау басқа күрделі қозғалыстармен салыстырғанда жеңіл болады.