Жалпы бөлім 1-БӨлім. Жалпы ережелер

20-тарау. МАУСЫМДЫҚ ЖҰМЫСТАРДА ІСТЕЙТІН ҚЫЗМЕТКЕРЛЕРДІҢ 
ЕҢБЕГІН РЕТТЕУ ЕРЕКШЕЛІКТЕРІ
      206-бап. Маусымдық жұмыстар
      Климаттық немесе өзге де табиғи жағдайлары бойынша белгілі бір, бірақ бір жылдан аспайтын
кезең (маусым) ішінде орындалатын жұмыстар маусымдық деп танылады.
      207-бап. Маусымдық қызметкерлермен еңбек шартын жасасу 
                ерекшеліктері
      1. Еңбек шартында маусымдық жұмыстар орындауға арналған шарт жасасу туралы талап және 
жұмыстарды орындаудың айқындалған кезеңі көрсетілуге тиіс. 
      2. Маусымдық жұмыстарға арналған еңбек шартын жасасу кезінде қызметкердің өзіне 
тапсырылатын жұмысқа сәйкестігін тексеру мақсатындағы сынақ мерзімі белгіленбейді.
      208-бап. Маусымдық жұмыстарда істейтін қызметкерлермен 
                еңбек шартын жұмыс берушінің бастамасы бойынша 
                бұзудың қосымша негіздері
      Маусымдық жұмыстарда істейтін қызметкерлермен еңбек шарты, осы Кодекстің 54-бабында 
көзделген негіздерден басқа: 
      1) жұмыс берушідегі жұмыстар өндірістік сипаттағы себептер бойынша екі аптадан артық 
мерзімге тоқтатылған; 
      2) қызметкер еңбекке уақытша жарамсыздығы салдарынан қатарынан бір ай бойы жұмысқа 
шықпаған жағдайларда жұмыс берушінің бастамасы бойынша бұзылуы мүмкін.
      209-бап. Маусымдық жұмыстарда істейтін қызметкерлермен 
                еңбек шартын бұзу тәртібінің ерекшеліктері
      1. Маусымдық жұмыстарда істейтін қызметкер, бұл туралы жұмыс берушіні күнтізбелік жеті 
күн бұрын жазбаша түрде ескерте отырып, еңбек шартын өз бастамасы бойынша бұзуға құқылы. 
      2. Жұмыс беруші маусымдық жұмыстарда істейтін қызметкерді еңбек шартының осы Кодекстің 54
-бабы 1-тармағының 1) және 2) тармақшаларында көзделген негіздер бойынша бұзылатыны туралы 
күнтізбелік жеті күн бұрын жазбаша ескертуге міндетті. 
      3. Маусымдық жұмыстарда істейтін қызметкермен еңбек шарты бұзылған кезде, жұмыс беруші 
пайдаланылмаған демалыс үшін өтемақы төлемін жұмыс істелген уақытқа барабар төлейді. 
      4. Маусымдық жұмыста істейтін қызметкермен еңбек шарты ұйымның таратылуына, қызметкерлер 
санының немесе штатының қысқаруына байланысты тоқтатылған кезде екі апталық орташа жалақы 
мөлшерінде демалыс жәрдемақысы төленеді.
21-тарау. ВАХТАЛЫҚ ӘДІСПЕН ЖҰМЫС ІСТЕЙТІН ҚЫЗМЕТКЕРЛЕРДІҢ 
ЕҢБЕГІН РЕТТЕУ ЕРЕКШЕЛІКТЕРІ
      210-бап. Вахталық әдіспен жұмыс істеу ерекшеліктері

      1. Вахталық әдіс, қызметкерлердің тұрақты тұратын жеріне күн сайын қайтып келуі 
қамтамасыз етіле алмайтын кезде, олардың тұрақты тұратын жерінен тысқары жерде еңбек процесін 
жүзеге асырудың ерекше нысаны болып табылады. 
      2. Жұмыс беруші вахталық әдіспен жұмыс істейтін қызметкерлер жұмыс өндірісі объектісінде 
болған кезде оларды тыныс-тіршілігін қамтамасыз ету үшін тұрғын үймен, жұмыс орнына және одан 
кері жеткізіп салуды, сондай-ақ жұмыс орындау жағдайларымен және 
ауысымаралық демалыспен қамтамасыз етуге және олардың тамақтануын ұйымдастыруға міндетті. 
      Жұмыс беруші қызметкердің жұмыс өндірісі объектісінде болу жағдайларын еңбек шартына, 
ұжымдық шартқа сәйкес қамтамасыз етеді.
      
Ескерту. 210-бапқа өзгеріс енгізілді - ҚР 2012.02.17 
№ 566-IV
 (алғашқы ресми 
жарияланғанынан кейін күнтізбелік он күн өткен соң қолданысқа енгізіледі) Заңымен.
      211-бап. Вахталық әдіспен жұмыс істеуге қойылатын 
                шектеулер
      Вахталық әдіспен орындалатын жұмыстарға он сегіз жасқа толмаған қызметкерлер, жүкті 
әйелдер, бірінші және екінші топтардағы мүгедектер жіберілмейді. Өзге қызметкерлер, егер мұндай
жұмыстар медициналық қорытынды негізінде олардың денсаулығына қайшы келмесе, вахталық әдіспен 
орындалатын жұмыстарға тартылуы мүмкін.
      212-бап. Вахтаның ұзақтығы
      1. Объектіде жұмыс орындау уақытын және ауысымаралық демалыс уақытын қамтитын кезең вахта
болып есептеледі.
      2. Вахтаның ұзақтығы күнтiзбелiк он бес күннен аспауға тиiс.
      Жекелеген объектілерде вахтаның ұзақтығы қызметкердің жазбаша келісімімен еңбек және (
немесе) ұжымдық шартқа сәйкес күнтiзбелiк отыз күнге дейін ұзартылуы мүмкін.
      Теңіз кемелері экипаждарының мүшелері үшін қызметкердің келісімімен вахтаның ұзақтығы 
күнтiзбелiк бір жүз жиырма күнге дейін ұзартылуы мүмкін.
      
Ескерту. 212-бап жаңа редакцияда - ҚР 2010.12.28 
N 369-IV
(алғашқы ресми жарияланғанынан 
кейін күнтізбелік он күн өткен соң қолданысқа енгізіледі) Заңымен, өзгеріс енгізілді - ҚР 
2012.02.17 
№ 566-IV
 (алғашқы ресми жарияланғанынан кейін күнтізбелік он күн өткен соң 
қолданысқа енгізіледі) Заңымен.
      213-бап. Вахталық әдіспен жұмыс істеу кезінде жұмыс 
                уақытын және тынығу уақытын есепке алу
      1. Жұмыстың вахталық әдісі кезінде айлық, тоқсандық немесе өзге де неғұрлым ұзақ, бірақ 
бір жылдан аспайтын кезең ішіндегі жұмыс уақытының жиынтық есебі белгіленеді. 
      2. Есептік кезең жұмыс уақытын, демалыс уақытын, жұмыс беруші 
орналасқан жерден немесе жиналатын жерден жұмыс орнына дейінгі және одан кері қайту жолының 
уақытын қамтиды. Бұл ретте, есептік кезеңдегі жұмыс уақытының жалпы ұзақтығы осы Кодексте 
белгіленген нормалардан аспауға тиіс. 
      3. Жыл сайынғы ақылы еңбек демалысын вахтааралық тынығу кезеңінде бөліп беруге жол 
берілмейді. 
      4. Жұмыс беруші вахталық әдіспен жұмыс істейтін әрбір қызметкердің жұмыс уақыты мен 
тынығу уақытының есебін ай бойынша және барлық есептік кезең бойынша жүргізуге міндетті.