Қуаңдығы мен ыстықтығы орташа агроклиматтық аудан

Гидротермикалық коэффициенті 0,7-ден астам. Тиімді темпера­тура 3000 градустан аз. Бұл кездегі жауын-шашын жиынтық мөлшері 170 миллиметр, жылдығы 450-500 миллиметр, Ауаның суық кезеңдегі орташа температурасы -3, -4 градус, жылы кезеңдегі температура 22,5 градус, кейде тіпті одан да төмен. Ауаның жылы кезеңі 120 күнге созылады, төменгі жазықта ол 85-90 күндей болады, ал биіктікке қарай 140 күнге дейін жетеді. Қыс ызғары апрельдің соңы -майдың екінші онкүндігіне дейін сақталады. Күзгі суық сентябрьдің ортасында түседі.

Топырақтың тоңазымай жатуы 105 күн, ал беткі қабатындағы ызғардың қайтуы майдың үшінші онкүндігінің бас кезі. Күзде ол сентябрьдің алғашқы онкүндігінде тоңазиды. Жыл бойында ылғалдылығының ең төмен болатын уақыты 120 күндей, ал 90-100 күн аңызақты келеді.

Қар қабаты ноябрьдің үшінші онкүндігі -декабрьдің бірінші онкүндігінде құралады. Қалыңдығы 20-40 сантиметрден 70 сантиметрге дейін жетеді. Қардағы су запасы 40-80-нен 120 миллиметрге дейін. Қардың жату ұзақтығы 80-160 күн.

Жазық және қыратты жерлерде ең төменгі температура -32-37 градус, ал рельефі төмен аудандарда -37-42 градус. Жылымық және желді күндерде қар босап, жер жалаңаштанып қалады, мұның өзі күздік дақылдардың қыстап шығуын қиындатады.

Қырғыз тауының солтүстік бөлігі жазғы жайылым және тәлімі егіншілік үшін, ал Қаратау, Шу-Іле тауының беткейлері көктемгі-жазғы жайылым үшін пайдаланылады.