Сауалнаманы жүргiзген Дулат Қожахметов

Өңiрiмiздiң жастары жазғы демалыстарын қызықты өткiзуде

Жаз мезгiлi кезiнде жастардың көпшiлiгi дем алатыны белгiлi. Мектеп оқушылары демалыстарын көңiлдi етiп өткiзуге тырысатын болса, арнайы орта бiлiм беретiн оқу орындардың шәкiрттерi мен ЖОО студенттерi жұмыс iстеуге талпынатыны белгiлi. «Облыс орталығындағы жастарымыз бос уақытын қалайша тиiмдi етiп ұйымдастырады?» деген сұраққа жауап iздеу мақсатында бiздiң тiлшiмiз сауалнама жүргiзген едi.

Сымбат Алтынбаева, СҚМУ студентi:

– Жаздыгүнi жас ұрпақ өкiлдерi өздерiнiң демалыстарын тартымды да қызықты деңгейде өткiзгiсi келедi ғой. Мен ақылы бөлiмде оқитындықтан, әрине, қосымша қаржы көзiн тауып, жұмыс iстеуге тура келедi. Бүгiнде мен Петропавл қаласындағы дәмханалардың бiрiнде даяшы болып еңбек етемiн. Менiң ойымша, жазғы демалыс барысында жастардың барлығы да екi қолға бiр күрек тауып, жұмыс iстеуге деген құлшынысы болғаны абзал. Осының нәтижесiнде ғана демалыс ауыз толтырып айтарлықтай өтедi. Сонымен қатар, мұның арқасында өскелең толқынға өздерiне мол тәжiрибе жинақтауға мүмкiндiк бар.

Нұргелдi Жұмашев, Әбу Досмұхамбетов атындағы облыстық дарынды балаларға мамандандырылған гимназия-интернаттың оқушысы:

– Үстiмiздегi жылы мен тоғызыншы сыныпты бiтiрдiм. Маған мектеп қабырғасында бiлiм кенiн игеру ұнайды. Себебi, бiлiм дегенiмiз жұмбаққа толы бейнебiр әлем тәрiздi ғой. Сабақ барысында әрбiр шәкiрт қарастырылып жатқан тақырып туралы мол мағлұмат алады. Жазғы демалыс аясында мен далада қыдыруды, аулада достармен әртүрлi ойындарды ойнауды ұнатамын. Сонымен қоса маған Астана және Алматы сияқты үлкен шаһарларға барып, саяхат жасау ұнайды. Келешектегi арманым - шетелде жазғы демалысымды өткiзу.

Аслан Оразаев, СҚМУ студентi:

– Қазiргi кезде өңiрiмiздегi колледждер және университеттiң ақылы бөлiмiнде тәлiм алып жүрген жастар көп. Әлбетте, бұл оларға да үйдегi ата-аналарына да ауырлық түсiредi. Осы орайда олардың көпшiлiгi жаздыгүнi еңбек етудi қалайды. Облысымыздағы «Жасыл» ел еңбек және құрылыс еңбек жасақтары, секiлдi тамаша бағдарламалардың арқасында жас буынның жұмыспен қамтамасыз етiлуiне мол мүмкiндiк бар. Әрине, бұл барша жастарымызды қуантады. Мен жазғы демалыс кезiнде жұмыс iстеудi ұнатамын. Демалыс күндерi ауылдағы ата-анама барып, оларға көмектесемiн. Ауылдың табиғаты тамаша ғой.

Константин Рогов, Бiрiншi гимназияның шәкiртi:

– Мен жаз мезгiлi басталысымен достармен кездесiп, олармен серуендеудi ұнатамын. Сонымен қатар мен спортты дос тұтамын. Мен бес жасымнан бастап каратэнiң шинкекушинкай түрiмен шұғылданамын. Қол жеткiзген жетiстiктерiм де мақтануға тұрарлықтай. Олардың барлығы бапкерiм Руслан Сәрсенбаевтың қажырлы еңбегiнiң және менiң тынымсыз жаттығуымның нәтижесi болып табылады. Спорт денсаулықтың сенiмдi серiгi ғой. Осы орайда мен облысымыздың жастарын саламатты өмiр салтын ұстанып, спортпен айналысуға шақырамын.