Пәнаралық байланыстарды жүзеге асыруға арналған әдістемелік нұсқаулар

«Кинематика негіздері» тақырыбын өткенде механиканың негізгі ұғымдарын оқып-үйрену, векторлар және оларға амалдар қолдану, нүктенің координаталары, вектордың проекциялары, сызықтық функция және оның графигі, квадрат теңдеулер, теңдеулер жүйесі, шеңбер, оған жанама жайлы білім пайдаланылып, іске асырылады.

«Аспан сферасы және аспан координаталары» тақырыбын оқып-үйрену кезінде окушылардың дүниетану курсында (4 сынып) біздің планетамыз және басқа да аспан денелері туралы алған алғашқы ұғымдарды: географиялық координаталар, уақыт санау және бағыт анықтау тәсілдері туралы, Жер және оның табиғи-климаттық заңдылықтары, уақыт пен күнтізбе туралы география курсынан (5-7 сыныптар) алған толығырақ мәліметтерге сүйену қажет.

Аспан денелерінің табиғатын қарастырғанда химия курсында (8-9 сыныптар) алған заттардың құрамы, құрылысы және қасиеттері туралы деректерді пайдаланған жөн.

Атомдық және ядролық құбылыстарға байланысты тақырыптар бойынша материалды игеру жарықтың биологиялық әсері, фотосинтез, рентген сәулелерінің клеткаға тигізетін мутациялық әсері, ультракүлгін сәулелер мен инфрақызыл сәулелердің тірі организмдерге тигізетін әсері туралы биологиядан (7 сынып, III тоқсан) алған білімге, элементтердің периодтық жүйесі, изотоптар және атом ядросының құрылысы туралы химиядан (8 сынып) алған білімдеріне сүйену арқылы іске асады.

Есеп шығарғанда және лабораториялық жұмыс орындағанда оқушылардың сызықтық теңдеулер мен сызықтық теңдеулер жүйесін шеше білетіндіктері ескеріледі (Математика, 4 сынып).