Жоспар: 1 Интонацияның зерттелуі Интонацияның маңызы Интонацияның зерттеу әдістері

Интонацияның бір басты мәселе оның негізгі қызметімен байланысты. Осы күнге дейін жалпы тіл білімінде интонацияның функцияларына деген көзқарас біркелкі емес. Интонацияның функциясына қатысты неше түрлі пікірлер мен таптастыруларды кездестіруге болады. Бұларда әркім әр түрлі өзгешеліктер мен қасиеттерді негізге алады. Интонацияға арналған зерттеулердің басым көбінде оның адамдар қарым-қатынасындағы рөлі мойындалып, барлық тілдерге тән универсалды категория екені көрсетіледі. Дегенмен, интонацияның көрінісі әр тілде әр түрлі. Солай екенін әр тілдегі сөйленісті тыңдап, бірден байқауға болады. Ондағы сөзді түсінбегенмен, сөйлеу мәнеріне, интонациясына қарап, сөйлеп тұрған адамның қытай ма, әлде француз ба, орыс па, жоқ итальян ба – кім екенін айыруға әбден болады. Бұл жайт интонацияның барлық тілдерге тән универсалды категория екенін ғана емес, оның әр тілдегі орны мен өзгешеліктерін де көрсетеді.