Р. Ж. Абжалиева А. А. Жиенбаев 2021 ж. 2021 ж. "Жаһандық құзыреттіліктер" «Әдеп және парасаттылық» таңдау курсы бағдарламасы

Әдеп нормалары мен парасаттылық қағидаларын оқу арқылы оқушылар бойында әдептілік, ізгі-ниеттілік, адалдық, толеранттылық, іс-әрекеттеріне жауапкершілік, ұжымда жұмыс істей білуі сияқты жеке қасиеттер туралы түсінік, білім, дағды қалыптасады.

Оқушылардың рухани дамуы мен өзін-өзі тануына, әдеп әліппесі мен парасаттылық негіздерімен танысуға бағытталған.

Әдеп: 1. Моральдық категория, адамдар қарым-қатынасында ізгілік нормаларын мүлтіксіз орындауды білдіретін ұғым. Белгілі бір халықтың әдет-ғұрпында тұрақтанып қалыптасқан этикалық тәртіп, тәрбие, ізеттілік, сыпайылық, ибалылық. Қоғамдағы адамдар мінез-құлқына қойылатын этикалық талаптарды білдіреді. Әдептің қоғамдағы басты қызметі тұлғалық қатынастарды адамгершілік талаптарына сәйкес ретке келтірумен байланысты.

2. Халықтың әдет-ғұрпында қалыптасқан этикалық тәртіп. Игі әдетпен, өміршең әдет-ғұрыпппен қалыптасқан ұлттық мәдениеттің көрінісі, мәдени үрдістердің, имандылықтың тірек негізі.

Парасаттылық– адам бойындағы кісілік қасиет. Парасаттылық ұғымы ақылдылық пен білімпаздық, мәдениеттілік, көрегенділік, зерделілік мағынасында қолданылады. Парасатты адамға адамгершілік, инабаттылық, салиқалылық, мейірімділік, ізгілік, әдептілік, ұстамдылық,  талғампаздық қасиеттері тән. Көпті көрген, көп білетін мұндай адам сөйлейтін әр сөзін ойланып, ақыл таразысына салып айтады. Дәстүрлі қазақ қоғамында парасатты адам бойында кездесетін асыл қасиеттердің біріне айналып, адамгершілік пен өнегелілік тұрғысынан жоғары бағаланған.

Бағдарламаға әдеп нормалары, парасаттылық негізі-рухани адамгершілік қасиеттер, патриоттық құндылықтар, ұлы тұлғалар өсиеті, құқықтық негіздер тақырыптары қамтылды. Оқушыларға әдептілік, адалдық, парасаттылық құндылықтары туралы және бұл құндылықтарды өмір бойы жоғалтпау, жақсылық пен парасаттылық тек адамның ғана емес, мемлекеттің де әл-ауқатына жұмыс істей алатыны туралы айтылады.

Әдеп мәдениетімен танысу жас ұрпақтың әлеуметтік бейімделуіне ықпал етеді, жеке өсу мен өзін-өзі жүзеге асырудың негізін қалайды, әлемдік этикет нормаларымен таныстырады. Сабақ барысында оқушылар басқалармен сындарлы қарым-қатынас құру туралы негізгі этикет білімін игере алады. Оқушылардың ересек адамдардың мінез-құлық ережелері туралы тұтас көзқарасын қалыптастыруға және дамытуға ықпал етеді, бұл жасөспірімдерді ересек өмірге бейімдеу мәселесін шешуге көмектеседі.