Дарыныңды дәлелде

Дәстүрлі байқау биыл Бурабайдағы «Балдәурен» республикалық оқу-сауықтыру орталығында ел Тәуелсіздігінің 20 жылдығын мерекелеуге арналған іс-шаралар аясында Білім және ғылым министрлігінің «Дарын» республикалық ғылыми-практикалық орталығының ұйымдастыруымен өтті. Еліміздің барлық аймағынан жиналған ең үздік педагогтар мен психологтар дарынды балаларға білім беру мәселелерін талқылап, үздік әдістемелер мен оқыту бағдарламаларын ұсынды.

«Дарын» республикалық ғылыми-практикалық орталығының директоры Шолпан Қирабаеваның айтуынша, байқаудың қорытынды кезеңіне 162 жұмыс ұсынылған, оның 85-сі қазылар алқасының сараптауына өткен. «Бұл жұмыстардың 10-ы республикалық, 68-і қалалық, 8-і ауылдық білім ордасында жұмыс істейтін ұстаздардың еңбегі. Біздің орталық қарапайым мұғалімдерге үлкен қолдау көрсетіп келеді. Екі жылда бір рет инновациялық идеялар фестивалін өткізіп тұрамыз. Онда авторлық бағдарламалар ұсынылады. Сондай-ақ, мектеп психологтарының отырысын өткізу арқылы көптеген мәселелерді талқылап, ертеңгі күннің бағыт-бағдарын айқындауға мүмкіндік жасалуда. Дәстүрлі «Үздік авторлық бағдарлама» байқауына биыл Шығыс Қазақстан, Қостанай, Алматы, Қарағанды, Оңтүстік Қазақстан облыстарының, Астана қаласы, республикалық мамандандырылған дарынды балаларға арналған білім беру ұйымдарының ұстаздары ерекше белсенділік танытты. Жеңімпаздар мен жүлдегерлердің еңбектері бойынша арнайы кітапшалар дайындаймыз. Ол орталықтың сайытында жарияланып, мектеп мұғалімдерінің өз жұмыстарында пайдалануына мүмкіндік жасалады», дейді Шолпан Ақашқызы. Биыл сегізінші рет өткізіліп отырған байқауға қатысушылар саны да арта түсуде екен. Осы уақыт аралығында еліміздің 1223мұғалімдері қатысып, өз авторлық бағдарламаларын ұсынған. Ал, ең үздік 28 авторлық жұмыс республиканың дарынды балаларға арналған арнаулы мектептерінде қолданылып келеді. Оқытуды мейлінше жаңа сапаға көтеру мақсатындағы мұғалімдер ұсынып отырған идеялар да тың әрі ауқымды, терең ізденістен туған еңбек. Мысалы, Өскемен қаласы, дарынды балаларға арналған Жамбыл атындағы ОММГИ оқытушысы Исаханова Гүлназ ұсынған бағдарламаның басты мақсаты – оқушыларға Елбасын таныту. «Бұл бағдарламаны жасауда өз шәкірттерім көп комек көрсетті. Елбасының өз еңбектерін, халықтың шешендік сөздерін, Сөз оралымдарын теріп, сөздік құрастырдық және шығармашылық тапсырмалар жүйесін жасадық», - дейді Г. Исаханова. Ал, Батыс Қазақстандық ұстаз Арайлым Мағзұмова Алаш тарихын факультативтік сабақта тереңдете оқытудың тың әдісін ұсынып отыр. Оңтүстік Қазақстан облысының Сарыағаш ауданы №4 Дарынды балалар мектебінің мұғалімі Сұлтан Сүлейменов оқушыларын журналистикаға баулып, қиын да қызықты мамандықтың әліппесін меңгеруіне мүмкіндік жасауда екен. Республикалық байқаудың қорытындысы бойынша, Ә. Бірмағамбетов (Астана қаласының дарынды балаларға арналған «Зерде» мектебі), С. Жекебаев («Дарын» Қарағанды облыстық дарынды балаларға арналған мектеп-интернаты), Г. Исаханова (Жамбыл атындағы Шығыс Қазақстан облыстық дарынды балаларға арналған мектеп-интернаты), С. Түсіпов (Шығыс Қазақстан облысы Семей қаласындағы Шәкәрім атындағы мамандандырылған дарынды балаларға арналған мектеп) сынды үздік педагог-авторлар жеңімпаз атанды. Байқау жеңімпаздары мен жүлдегерлері Білім және ғылым министрлігінің дипломдарымен және «Дарын» РҒПО-ның номинациялары бойынша алғыс хаттармен марапатталды.

Конкурс бағдарламасында «Мұғалім жетістігінің формуласы» педагогикалық қонақжайда ғалымдармен жүздесу өткізіліп, шараға қатысушылар Бурабай тарихи және табиғи ескерткіштер аймағына саяхат жасады.

«Дала мен қала» газеті,

Әлеумет / №14 бет.