Бағдарламалу технологиясы

10.4 C# тіліндегі файлдар

C# тілінде файлдармен жұмыс жасауға арналған бірнеше класс бар.

Белгілі бір кластар тобы (олар System.IO атаулар кеңістігінде орналасқан) файлдармен деректер бірлігі сияқты жұмыс істейді. Олардың міндетіне каталогтармен (файлдар папкасы) жұмыс жасау, файлдардың орнын ауыстыру, олардың атауларын өзгерту, көшіру, файл атрибуттары, файлдарды ұсыну кестесімен (FAT) жұмыс жасау кіреді. Осы топты шартты түрде файлдарды өңдеу класы деп атауға болады.

Windows жүйесінде (сонымен қоса C# тілінде) түрлі құрылғылар (оперативтік жад, монитор, дискілік жад, желілер) арасында деректерді жеткізу үшін деректер ағыны (stream) тұжырымдамасы қолданылады.

Деректердің екілік, символдық, жолдық ағынымен анықталған файлдармен жұмыс жасауға көмектесетін арнайы кластар бар. Осы кластар да System.IO кеңістігінде анықталған.

C# тілінде құрылымдар, кластар түрінде көрсетілген деректермен жұмыс жасау үшін сериализация ұғымына топтастырылған арнайы класс жиынтығы бар.

Сериализация ұғымын объекттерді, жазбаларды байттар тізбектілігіне түрлендіру процесімен түсіндіруге болады (файлға жазылатын ақпарат байттар тізбектілігімен берілуі керек). Кері процесс - байттар тізбектілігінен объекттерді, жазбаларды қалпына келтіру десериализация деп аталады.

Кейде сериализация дегеніміз – объекттің ағымдағы жағдайын жадыда немесе ақпарат құрылғысында сақтау, ал кері үдеріс - ақпарат құрылғысынан деректерді оқу десериализация деп аталады.

Сериализация мен десериализация процесстерін басқаратын класс System.Runtime.Serialization атаулар кеңістігінде орналасады.