Республикалық бюджет бойынша тапшылық

Республикалық бюджет бойынша тапшылық 554,8 млрд. теңге сомасында немесе жалпы ішкі өнімнің 2,6%-ы деңгейінде қалыптасты, бұл жоспардағыдан 248,8 млрд.теңгеге кем.

Бюджет тапшылығын қаржыландыруға 882,2 млрд.теңге көлемінде сыртқы және ішкі мемлекеттік қарыздар тартылды. Ішкі нарықта орналастырылған мемлекеттік эмиссиялық бағалы қағаздар бойынша және сыртқы қарыз шарттары бойынша борышты өтеу 290,1 млрд.теңгені құрады. 2011 жылғы 1 қаңтардағы жағдай бойынша бюджет қаражатының пайдаланылмаған қалдығы 93,4 млрд. теңгені құрады.

Үкіметтік қарыз алу бюджеттік бағдарламаларды уақтылы қаржыландыру мақсатында жүзеге асырылды. Ішкі қарыз алуды мемлекеттік бағалы қағаздар шығару жолымен жүзеге асыра отырып, Қаржы министрлігі, халықаралық тәжірибе көрсетіп отырғандай, бюджет тапшылығын қаржыландырумен бір қатарда борыштық құралдар нарығын қолдау міндеттерін де шешіп отырды. Сырттан қарыз алу саласында инвестициялық жобаларды қаржыландыру үшін халықаралық қаржы институттарының қарыздарын тарту жүзеге асырылды. Бұдан басқа, есепті жылда Үкіметтің Дағдарысқа қарсы бағдарламасын іске асыруға Халықаралық Қайта Құру және Даму Банкінің қаражаты тартылды.

Есепті жылдың қорытындылары бойынша үкіметтік борыш деңгейі мен оған қызмет көрсету және өтеу бойынша ағындар жол берілетін және қауіпсіз шекте болып табылады. 2011 жылғы 1 қаңтардағы жағдай бойынша Үкіметтік борыш 2 222,0 млрд. теңгені немесе жалпы ішкі өнімнің 11,5 %-ын құрады. Инфляция мен пайыз ставкаларының ағымдағы деңгейлері кезінде 2010 жылы 10,6% деңгейінде қалыптасқан борыштық жүктеме лимиті (борышқа қызмет көрсету және өтеуге шығыстар республикалық бюджет кірістерінің 15%-нан аспауға тиіс) сақталады. Негізгі макроэкономикалық көрсеткіштерді талдау Қазақстанға орта мерзімді кезеңде өзінің борыштық міндеттемелерінің орындалуын қамтамасыз ете алмайтындай жағдайлар жоқ деп болжамдауға мүмкіндік береді.