ҚҰрметті жерлестер!

Өткен 2018 жыл еліміз үшін экономикалық тұрақтылықты қалыптастырған жыл болды. Жалпы ішкі өнім – 4,5%-ға өсім қалыптасты. Қазақстан Республикасы Президенті Н.Ә.Назарбаевтың Жолдауынан туындайтын келелі істер мен міндеттерді іске асыру бағытындағы аудан әкімінің іс-қимыл бағдарламасы аясында ауданымызда ел игіліне арналған жоспарлы жұмыстар атқарылды.

Жасалған жұмыстар халықтың әлеуметтік жағдайын жақсартуға, өтініш-тілектері мен көтерген мәселелерін шешу мақсатында жүргізілді және бірқатар мәселелер шешімін тапты.

Аудан халқының өткен жылғы есепті кездесуде айтылған ұсыныс пікірлеріңіз бойынша 24 іс-шаралар белгіленді. Бүгінгі күнге, оның 9-ы өз шешімін тапса, 14-і қосымша бақылауға алынып, 1-не түсіндірме берілді. Бақылауға алынған мәселелердің негізгі бөлігі құрылысты және жөндеуді қажет ететін жұмыстар. Олар бойынша тиісті жоғары тұрған органдарға ұсыныстар берілді және кезең-кезеңімен шешімін табатын болады.

Жалпы, соңғы үш жылда аудан экономикасының өсу динамикасы қалыптасып келеді. 2016 жылы аудан бюджеті 9 млрд 958 млн, 2017 жылы 10 млрд 343 млн. 2018 жылы аудан бюджеті 14 млрд 115,1 млн. теңгені құрап, 40 пайызға артты.

Есепті кезеңге аудан бюджетінің өз кірістері жоспар 1 млрд 11 млн.теңгені құрап, 101,2 пайызға орындалды.

2018 жылдың 31 желтоқсанына аудан бюджетінің шығындар болжамы 14 млрд 106 млн теңгеге атқарылып, 99,9 пайызды құрады.

Енді қысқаша ауданның әлеуметтік-экономикалық даму көрсеткіштеріне тоқталып өтсек.

Елбасының саясатын жүзеге асыру мақсатында шағын және орта кәсіпкерлікті дамытуға, жаңа жұмыс орындарын ашуға, сол арқылы аудан экономикасын дамытып, аудан бюджетінің кірістер бөлігін ұлғайтуға жұмыстар жүргізілуде.

Облыс әкімі мен облыстық мәслихаттың және облыстық кәсіпкерлер палатасының бірлескен шешімімен 2018 жыл облыс бойынша кәсіпкерлікті қолдау жылы деп жарияланды және кәсіпкерлік жылы тағы да екі жыл мерзімге ұзартылды.

Мемлекеттік бағдарламаларды жүзеге асыруға тұрақты негізде жұмыстар жүргізіліп, жаңа жұмыс орындарын ашуға, кәсіпкерлік субъектілерінің жұмыс істеуіне жағдай жасалды. Осы жұмыстардың нәтижесінде аудан кәсіпкерлерінің несиеге қолжетімділігі артты.

2018 жылы аудан бойынша қаржы ұйымдары тарапынан барлығы 227 жобаға 774,0 млн. теңге жеңілдетілген несие берілді. Нәтижесінде 300 жаңа жұмыс орны ашылды.

2018 жылы Қызылорда облысында кәсіпкерлікті дамытудың Жол картасына сәйкес, «Бастау Бизнес» оқу курсына ауданда 220 азамат аяқтап, 176 азамат жобаларын қорғады.

Бұдан бөлек, қаржы ұйымдарынан несие алу үшін кепіл мүлкі жоқ 33 жоба иесіне «Бизнестің жол картасы - 2020» бағдарламасы шеңберінде өз жобаларын жүзеге асыру үшін 23,2 млн.теңге көлемінде қайтарымсыз гранттар беріліп, жобаларын жүзеге асыруда.

2018 жыл басынан бері аудан бойынша 29 кәсіпкерлік нысан іске қосылды (оның ішінде 14 дүкен, 2 кафе, 4 қойма, 1 наубайхана, 4 көлік жөндеу орталығы, 2 тойхана, 1 сауда орталығы, 1 шаштараз).

Осындай жобалардың жүзеге асырылуы аудандағы шағын кәсіпкерліктің дамуына мүмкіндік туғызды. Кәсіпкерлік саласында шағын және орта кәсіпкерлік субъектілерінің саны 3357 болып, өткен жылдың тиісті кезеңімен салыстырғанда 101,5 пайызды құрады (2017 жылы 3308 кәсіпкерлік субъекті). Оның ішінде, жұмыс жасап тұрған субъектілер саны 2566 бірлік, бұл барлық тіркелген кәсіпкерлік субъектілерінің 78,9 пайызы.

Жылдық айналымы 2,0 млн теңгеден асқан кәсіпкерлік субъектілердің саны 569 бірлікті құрап, жұмыс жасап тұрған кәсіпкерлік субъектілердің 22,2 пайызын құрады.

(Дара кәсіпкерлер 2018 жылдың екінші жарты жылдығы бойынша салық есептілігін 2019 жылдың қаңтар-ақпан айларында тапсыратынын ескерсек, жыл қорытындысымен айналымы 2,0 млн теңгеден асатын кәсіпкерлер үлесі артады деп жоспарлануда).

Өнеркәсіп саласында 2018 жылдың 12 айында 3, 418 млрд.теңгенің өнімі өндіріліп, өткен жылмен салыстырғанда 113,9 пайызды құраса, оның ішінде өңдеу өнеркәсібінде өнім өндіру 105,9 пайызды (2684 млн.теңге) құрады.

Құс фабрикасының құрылысы

«Қармақшы ауданы Ақтөбе елді мекенінде жылына 1500 тонна құс етін өндіретін құс фабрикасының құрылысы» басталды.

2018 жылы «Байқоңыр ӘКК» арқылы 458,0 млн.теңге жоба бастамашысының «Ақтөбе и К» серіктестігі арқылы 200,0 млн.теңге, барлығы 658,0 млн.теңге қаржысы игерілді.

Ендігі кезекте құс фермасының инженерлік инфрақұрылымдарымен қамтамасыз ету бойынша (су, электр энергиясы, жолдар) жұмыстар жүргізілуде.

Құс фабрикасын 2019 жылы іске қосу жоспарланған. Кәсіпорынның іске қосылуы ауданда азық-түлік өндірісін дамытуға, жаңа жұмыс орындарын ашуға, сонымен қатар, жем қорын дайындауға қажетті дақылдар егу көлемін арттыруға, сол арқылы егіс саласын әртараптандыруға өз ықпалын тигізетін болады.

Өткен жылмен салыстырғанда суды көп қажет ететін күріш көлемі 359 гектарға азайтылды, ал жаздық бидай 8 гектарға, бақша 4 гектарға, көкөніс 100 гектарға, мақсары 362 гектарға көбейді. Күріштің «Тором Хошеми» ирандық сортын «Ақтөбе и К» ЖШС 300 гектарға жеткізді.

Дәстүрлі күріш дақылынан басқа да майлы дақылдарды, оның ішінде сояны өндірістік негізде өсіруді бастауымыз қажет. Бұл суды аз талап ететін және нарықта сұранысқа ие болып отырған дақылдардың бірі. Биыл біз «Тұрмағамбет» ЖШС-і негізінде осы дақылды егуді бастаймыз.

Ауылшаруашылығы өнімдерін өңдеу мақсатында «Жаңажол» серіктестігінің құны 65,0 млн теңге болатын қуаттылығы сағатына 5 тонна күріш ақтайтын өңдеу зауыты іске қосылды. Оған қосымша жоба құны 40 млн теңге болатын астық сақтайтын қойма құрылысы салынып, пайдалануға берілді.

2018 жылы егін шаруашылығына 524,0 млн.теңге көлемінде субсидия есептеліп берілді.

Иіркөл және Төребай би ауылы тұрғындарының негізгі кәсіп түрі егін және бақша шаруашылығы болғандықтан, бұл ауылдық округ үшін аяқ су мәселесінің маңызы жоғары.

2018 жылы аяқ су мәселесін шешу мақсатында «Балажарма» каналын тазартуға облыстық бюджеттен 40,0 млн теңге бөлініп, тазарту жұмыстары жүргізілді.

Сонымен қатар, ауданды қажетті аяқ сумен қамтамасыз ету үшін оң жағалау каналының бойындағы №111 бекетінен бұрмақұлақ су құрылысы жүргізілуде, құрылыс жұмыстары көктемгі егіс басталғанға дейін аяқталады. Нәтижесінде шаруашылықтарға қажетті аяқ су көлемін жеткізу мүмкіндігі ұлғаятын болады.

Анықтама үшін.

Биылғы ауа-райына байланысты біршама қиындықтар туындағанымен (дақылдардың пісіп жетілуі 7-10 күн кеш) диқан қауымы бітік, мол егіс өсіре білді.

Шаруашылық басшылары жүргізілген жұмыстардың нәтижесінде, су тапшылығы болжамын түсіне отырып, 1,0 мың гектарға жуық егісті еккен жоқ, каналдың ең аяғындағы «Алдашбай ахун» ауылдық округінде күріш орналастырылмады.

Қабылданған шаралардың нәтижесі мен диқан қауымның тынымсыз еңбегі өз жемісін берді, егіс судан қалған жоқ.

Егіске барлығы 3800 тонна элита, І-ІІІ репродукциялы күріш тұқымдары жұмсалды.

(130-элита, 1355 тн – 1 репродукциялы, 1820 тонна- 2 репродукциялы, 438 тонна - 3 репродукциялы тұқымдар)

(Сорттары бойынша: маржан -960 гектар, лидер – 10120 гектар, янтарь – 2110 гектар, новатор – 650 гектар.)

Егіске 9495 тн минералдық тыңайтқыштар (6440 тонна аммоний сульфаты, 2560 тонна карбамид, 1495 тонна аммофос) жұмсалып, 12 000 гектар алқап үстеп қоректендірілді.

11000 гектар күріш алқабы арамшөптер мен зиянкестерге қарсы гербицидтермен (14040 л рейнбоу, 300,0 л гербитокс, 1200 л солито, 2180 л Ураган форте) өңделді.

Күзгі егін жинау жұмыстарына жұмылдыратын техникалар 116 - трактор, 80 - комбайн, 84-жатка, 62 - жүк көлігі, 94-трактор тіркемесі дайын. Дала қостары мен астық қырмандары толығымен жасақталды.

Биылғы жылы жанар – жағар май жеткізуші оператор «Нефтьтранс Кызылорда» ЖШС болып табылып, егін жинау жұмыстарына барлыға 2370 т дизель отыны жиналды.

Қазақстан Республикасының Президенті Елбасы Н. Ә. Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» атты биылғы Қазақстан халқына Жолдауындағы негізгі міндеттердің бірі – «Ақылды технологиялар» - агроөнеркәсіп кешенін қарқынды дамыту, алдағы 5 жыл ішінде агроөнеркәсіп кешеніндегі еңбек өнімділігін және өңделген ауыл шаруашылығы өнімінің экспортын кем дегенде 2,5 есеге арттыруды тапсырды.

Мал шаруашылығында статистикалық есептерге сәйкес өткен жылмен салыстырғанда мал басының бірқатар түрінен өсім қалыптасты. Жылқы 9118 бас болып- 982 басқа көбейді, түйе 3153 болып – 149 басқа көбейді, МІҚ 29087 бас болып -876 басқа көбейді, ешкі 20914 бас болып-426 басқа көбейді, қой 33103 бас болып 263 басқа көбейген.

Бұған мемлекеттік «Сыбаға», «Құлан», «Нәтижелі жұмыспен қамту және жаппай кәсіпкерлікті дамыту» бағдарламалары шеңберінде атқарылған жұмыстар септігін тигізді. 2018 жылы мал шаруашылығын қолдауға барлығы 58,3 млн.теңге субсидия бөлінді.

Мал басын көбейту мақсатындағы жұмыстарға мемлекет тарапынан түрлі бағдарламалар аясында қолдау көрсетіліп келеді. Қазіргі таңда аудан бойынша тұқымдық түрлендірумен 54 шаруа қожалығы айналысуда.

Аудандық бюджеттен арнайы техникалар (трактор) сатып алуға 29,1 млн теңге қаржы бөлініп, Т.Көмекбаев, Қуаңдария және Иіркөл ауылдық округтеріне трактор, тіркемесі және соқасы сатып алынып берілді. Бұл өз кезегінде ауыл тұрғындарының бақша-көкөніс өсірумен айналысуына тікелей жәрдемдесетін болады деген сөз.

Өткен жылы мал ауруларының алдын алу бағытында да тиісті жұмыстар жүргізілді.

2018 жылы мемлекет тарапынан жұқпалы аурулардың алдын алу мақсатында, аса қауіпті мал ауруларына қарсы екпелер және тексеру жұмыстары атқарылуда. Бұл шараларды атқаруға бюджеттен 80,0 млн. теңге бөлінді.

Ауданда ауылшаруашылығы жерлерін тиімді пайдалану мақсатында да жоспарлы жұмыстар атқарылды. Жеке және заңды тұлғаларға ауыл шаруашылығы мақсатындағы пайдалануға берілген 27456,5 га болатын 16 жер учаскесі нысаналы мақсатына сәйкес пайдаланбауына байланысты мемлекетке қайтарылды.

2018 жылы барлығы 7 аукцион өткізіліп, 56 жер учаскесі сатылып (жер учаскелерін жалға беруге 274 келісім-шарт, мемлекеттік жер учаскесін сатылып, жеке меншікке сатып алуға байланысты 37 келісім-шарт жасалды. Жер учаскелерінің нысаналы мақсатын өзгертуге байланысты 50 өтініш қанағаттандырылды), нәтижесінде жергілікті бюджетке 29,3 млн теңге түсірілді.

«Дипломмен – ауылға» бағдарламасы аясында ауылдық елді мекендерге жұмыс істеу және тұру үшін келген денсаулық сақтау, білім беру, әлеуметтік қамсыздандыру, мәдениет және агроөнеркәсіптік кешен саласындағы мамандарға әлеуметтік қолдау шараларын ұсыну мақсатында 54 маманға тұрғын үй сатып алуға 183,3 млн.теңге несие берілді.

Ауданымызда әлеуметтік-мәдени нысандар құрылысы, елді мекендерді байланыстыратын жолдарды жөндеу, ауылдың сәулеттік келбетін ашатын абаттандыру жұмыстары жүргізілуде. Құрылыс жұмыстарының көлемі 2 млрд 862,0 млн.теңге болып, өткен жылмен салыстырғанда 93,3 пайызды құрады. Аудан көлемінде 12 айдың қорытындысы бойынша жалпы ауданы 23 850,0 шаршы метр болатын 167 жеке тұрғын үйлер пайдалануға берілген. Пайдалануға берілген жеке тұрғын үйлердің өткен жылдың тиісті кезеңімен салыстырғанда 114,6 пайызға өскен (2017 жылы 20 800,0 шаршы метр).

Сатып алу құқығынсыз пайдалануға берілген арендалық тұрғын үйлердің жалпы алаңы 15 777,0 шаршы метрді құрайды.

Аудан бойынша құрылыс жұмыстарына салынған инсвестиция көлемі 2,9 млрд. теңгені құрады.

«Нұрлы-Жер» мемлекеттік бағдарламасы шеңберінде «Байқоңыр қаласындағы 50 пәтерлік 5 тұрғын үй құрылысы» объектісінің құрылыс жұмыстарына 2017 жылы облыстық бюджеттен 25,0 млн.теңге, 2018 жылы республикалық бюджеттен 1 млрд 899,0 млн.теңге және облыстық бюджеттен 108,3 млн.теңге қаралып, құрылыс жұмыстары жүргізілуде.

Сонымен қатар, 2018 жылы тұрғын үй нысандарын инженерлік желілермен қамтамасыз ету мақсатында жалпы 227,5 млн. теңгеге кәріз су және ауыз су желілерімен, электр желілерімен, жоғары қысымды жерасты газ құбырымен және жылумен қамтамасыз ету құрылысы 2018 жылдың желтоқсан айында аяқталды.

Жосалы кентіндегі 300 орындық №183 мектеп ғимаратының құрылысы (жобаның жалпы сметалық құны: 789,932 млн.теңге, келісім шарт соммасы – 775,500 млн. теңге) аяқталып мамыр айында пайдалануға берілді.

Иіркөл елді мекеніндегі 50 орындық №12 «Самал» (жобаның жалпы сметалық құны: 180,320 млн. теңге) Төребай би елді мекеніндегі 50 орындық №15 «Ақкөгершін» балабақшалары (жобаның жалпы сметалық құны: 184,800 млн. теңге) пайдалануға берілді.

Сонымен бірге, Төретам кентінен жалпы сметалық құны 365,0 млн. теңге болатын денешынықтыру-сауықтыру кешені салынып, құрылысы аяқталды. (мердігер мекеме «Интегрострой» ЖШС-гі, нысан пайдалануға берілді).

Жосалы кентіндегі жаз-қыс мезгілінде балалар демалатын лагерь құрылысына облыстық бюджеттен 300,0 млн теңге бөлінді. 2019 жылы құрылысы аяқталатын болады.

Нысанның жалпы сметалық құны 1 292,2 млн теңгені құрайды.

Аудан халықының 99,5% орталықтандырылыған ауыз су жүйесімен қамтылды.

Бұдан бөлек, алдағы уақытта құрылысы жүргізілетін нысандардың жоба-сметалық құжаттамасын әзірлеуге 2018 жылы 23,7 млн теңге қаржы жұмсалып, 9 нысанға ЖСҚ әзірленді.

Электр желілерін жаңарту бағытында 2019 жылы "Қармақшы ауданы Жосалы кенті тұтынушыларын электрмен қамту құрылыс-монтаж жұмыстарына – 60,5 млн теңге және Жосалы кентіндегі бас қосалқы қондырғысын қайта жаңғыртуға 610,6 млн. теңге қаржы қаралды.

Сонымен қатар, «Самара-Шымкент-Ақжар-Көмекбаев» автомобиль жолының 4,0 шақырымына күрделі жөндеу жұмыстарын жүргізу 2019 жылы 261,4 млн. теңге қаржы бөлініп жөндеу жұмыстары жалғасын табатын болады.

Сонымен қатар, аудандық маңыздағы «Қызылтам елді мекеніне кіре беріс» автомобиль жолына қайта жаңғырту жұмыстарын жүргізу үшін аудандық бюджеттен 7,0 млн.теңге қаржы бөлініп ЖСҚ әзірленді.

Жобаны жүзеге асыруға қажетті 383,1 млн. теңге қаржыны республикалық бюджеттен бөлуге министрлікке бюджеттік өтінім тапсырылды, жыл көлемінде қаржыландыру жоспарлануда.

Аудан көлемінде 3 автостанса, атап айтқанда Жосалы кентінде «Достық» автостансасы, Төретам кентінде жеке кәсіпкер «Ш.Махмутова» - автостансасы және «Тұлпар-Байқоңыр» ЖШС-нің автостансалары облыстық автовокзалдар, автостансалар және жолаушыларға қызмет көрсету пункттерінің тізіліміне енгізілген.

2019 жылы Жосалы кентіне газ жеткізу құбырының және кварталішілік газ тарту желілерінің құрылысы үшін Республикалық бюджеттен 753,0 млн.теңге бөлінді.

Бұл қаржыға биылғы жылы Жосалы кентіне газ кіргізу жұмыстары басталып, кенттің шығыс бетінің тұрғындары газға қосылатын болатын.

Жыл көлемінде республикалық бюджет нақтылануда қосымша қаржыландыру бағытында жұмыстар жүргізілуде.

Сонымен бірге, 2018 жылы Көмекбаев елді мекеніндегі №185 орта мектептің және Қуаңдария елді мекеніндегі №186 орта мектептің бу қазандықатарын сұйылтылған газге ауыстыру жұмыстарына ЖСҚ әзірленді.

2019 жылы жұмыстарын жүргізуге аудандық бюджеттен 24,4 млн теңге бөлініп отыр.

Құрылыс және жөндеу жұмыстарымен қатар, елді мекендерді абаттандыру, көркейту-көгалдандыру және жарықтандыру жұмыстары бойынша да біршама жұмыстар атқарылды. 2018 жылы барлық кент және ауылдық округтеріне абаттандыру және көгалдандыру жұмыстарына аудандық бюджеттен абаттандыруға 97,9 млн.теңге, санитарияға 15,3 млн.теңге, жарықтандыруға 83,1 млн.теңге бөлінді. Бөлінген қаржыларға елді мекендерде абаттандыру және көркейту жұмыстары жүргізілді.

«Өңірлерді дамыту - 2020» бағдарламасы шеңберінде 171,9 млн.теңге қаралып, елді мекендер бойынша көшелерді жарықтандыруға, абаттандыруға және «Келте арық» каналын қырып тазалау бағытталып, тиісті жұмыстар атқарылды.

Сонымен қатар, Төретам кентіндегі Амангелді көшесіндегі ластанған жерді қалпына келтіру жұмыстарына аудандық бюджеттен 16,3 млн. теңге қаржы бөлініп, жұмыстар толығымен ағымдағы жылдың шілде айында аяқталатын болады.

Өздеріңіз көріп отырғандай, атқарылып жатқан жұмыстардың барлығы негізінен халықтың әлеуметтік жағдайын жақсартуға бағытталып отыр.

«Қазақстандықтардың әл-ауқатының өсуі: Табыс пен тұрмыс сапасын арттыру» атты Қазақстан халқына жолдауында ең төменгі жалақы мөлшері 42,5 мың теңгеден төмен болмауы жөнінде тапсырма берілген болатын. Бұл міндетті орындау үшін 2019 жылғы аудандық бюджетке республикалық бюджеттен ең төменгі жалақы мөлшерінің өзгеруіне байланысты қызметкерлерінің жалақысын көтеруге 363,4 млн.теңге, олардың салықтық жүктемесін төмендетуге байланысты шығыстарды өтеуге 21,8 млн. теңге ағымдағы нысаналы трансферттер бөлінді.

Соңғы 3 жылда жұмыссыздық деңгейі 2016 жылы – 5,2 пайыз, 2017 жылы – 5,1 пайыз, 2018 жылдың қорытындысымен 5,0 пайызды құрайды деп жоспарлап отырмыз.

2018 жылы 2895 адам тұрақты және уақытша жұмысқа орналастырылды. (оның ішінде: жұмысқа жарамды мүгедек - 41 адам, жазасын өтеп келгендермен пробация есебінде тіркеуде тұрған азаматтар - 13, 16-29 жасқа дейінгі жастар – 630 адам /Байқоңыр қаласын қоса есептегенде/).

Ауданда 12 рет «Бос жұмыс орындары» жәрмеңкесі өткізілді. 2018 жылы аудан бойынша 775 жаңа жұмыс орындарын ашу жоспарланса, жылдың қорытындысымен 889 жаңа жұмыс орындары ашылды, немесе жоспар 114,7 пайызға орындалды. (Тұрақтысы 878)

Бағдарламаның І - бағыты бойынша 2018 жылға қайта даярлау курсына 100 адам оқуға жолданды. (қаржысы 33,7 млн.теңге)

Бағдарламаның ІІ - бағыты бойынша 233 жұмыссыз азамат кәсіпкерлік негіздерін оқытудың «Бастау Бизнес» курстарынан өтіп, 156 жоба 435,5 млн.теңгеге қаржыландырылып, 166 жұмыс орны ашылды.

Бағдарламаның ІІІ-бағыты бойынша әлеуметтік жұмыс орындарына республикалық және жергілікті бюджеттен 2018 жылға 22 млн.876 мың теңге бөлініп, 34 кәсіпкерлік субьектілеріне 167 адам жұмысқа жолданып, 105 адам тұрақты жұмысқа орналасты.

Жастар тәжірибесіне 309 жас маман 90 мекемеге жолданып, оның 68-і тұрақты жұмысқа орналасты.

Аудандағы тұрмысы төмен аз қамтамасыз етілген отбасылар мен мұқтаж азаматтарды әлеуметтік қолдау мақсатында 1019 отбасының 4827 алушысына 224,5 млн.теңге жаңа форматтағы атаулы әлеуметтік көмек төленді.

 - үйде тәрбиеленіп оқытылатын мүгедек 116 балаға 4212,0 мың теңге;

2018-2019 оқу жылында 28 жалпы білім беретін орта мектеп, 1 негізгі мектеп барлығы 29 мектеп жұмыс жасайды. Үш ауысымда оқитын және апаттық жағдайдағы мектептер жоқ.

Мектептерде 755 сынып жиынтығында 14294 оқушы білім алуда.

(Біліктілік санаты бойынша: 57 педагог-зерттеуші, 235 жоғары санатты педагог, 135 педагог-сарапшы, 632 І санатты педагог, 99 педагог-модератор, 417-і ІІ санатты педагог және 387 санатсыз педагог еңбек етеді.)

Оқушыларды жаңа оқулықпен қамтамасыз ету мақсатында – 157,0 млн.  теңгеге 147 616 дана оқулықтар сатып алынды. Ағылшын тілінде терминологиялық бағытта жаратылыстану пәндері (информатика, биология, химия, физика) бойынша тілдік курстардан аудан бойынша 44 мұғалім білімін жетілдіріп, 19 мұғалім дәріс беруде. Бұл бағытта дәріс берген мұғалімдердің жалақысына қосымша 35 мың теңге үстемақы төленуде. Сонымен қатар, барлық мектептерге электронды күнделік жүйесі толығымен енгізілді.

2017-2018 оқу жылында аудан бойынша мектеп бітіруші 652 түлектің 458-і (70,2%) Ұлттық Бірыңғай тестілеуге қатысып, жалпы орташа 83,7 балды құрады. Биылғы жылы 652 бітірушіден, 310 оқушы (47,5%) жоғарғы оқу орнының грантын иеленді.

Жалпы биылғы жылы мектеп бітірген 652 оқушының 645-і жоғары және арнаулы орта оқу орындарына орналасты.

Республикалық олимпиаданың облыстық кезеңіне ауданнан 15 мектептен 27-і оқушы қатысып, 12 оқушы жеңімпаз атанып, нәтижесімен облыс бойынша Қармақшы ауданы командалық есепте 2 орынға ие болды. Олардың 7-і Республикалық олимпиадаға қатысып, 3-і жүлделі орынмен оралды.

2018 жылы мектептердің материалдық-техникалық базасын нығайтуға 98,9 млн.теңге қаралып, қажетті құрал жабдықтар мен пәндік кабинеттермен жабдықталды.

Химия кабинетіне - 39,2 млн. теңге, физика кабинетіне 42,6 млн. теңге, биология кабинетіне 17,1 млн. теңге. Қазіргі таңда аталған кабинеттермен білім ұйымдары оқу процесінде пайдалануда. Сонымен қатар 10 мектепке робототехника кабинеті берілді.

Сонымен бірге, аудандық оқушылар үйі жанынан «IT» парктер ашу үшін «3D» және цифрлы лабораториялық білім беру кабинеті пайдалануға беріліп, қазіргі таңда бұл бағытта жұмыстар жүргізілуде.

Аудандағы білім мекемелері ғимараттарының ағымдағы жөндеу жұмыстарына 54,1 млн. теңге қаржы бөлініп, жөндеу жұмыстар толығымен атқарылды.

№183 мектептің ескі ғимаратына - 39,8 млн. теңге, №106 мектеп ғимаратының сыртқы фасадына - 10,5 млн. теңге, №274 мектептің ішінара терезелерін ауыстыруға бөлінді- 3,8 млн. теңге.

Бүгінгі таңда ауданда 34 мектепке дейінгі мекеме жұмыс жасайды.

Бұл мектепке дейінгі ұйымдарда барлығы 2823 бүлдіршін тәрбиеленуде. 3-6 жас аралығындағы балалар балабақшамен 100 пайыз қамтылған. Қазіргі уақытта барлық балабақшалар "электронды балабақша" жүйесіне қосылған.

Ауданда тұрақты түрде спортпен шұғылданушылар саны 2018 жылдың аяғында 15201 адам болып, 28,0 пайызға жетті.

Үстіміздегі жылы аудан спортшылары Қазақстан Республикасының чемпионаттарында 12 алтын, 15-күміс, 25-қола медальды иеленсе, Әлем және Азия чемпионаттарында 5-алтын, 6-күміс, 1-қола медальды жеңіп алды.

Үстіміздегі жылы ауданымыздың 6 спортшысы – Қазақстан Республикасының спорт шебері атағын иеленсе, спорт шеберлігіне үміткер 67-спортшының және 38-і – І разрядты спортшы нормативін орындады. (Буторина Кристина, Орынбеков Ермахан ауыр атлетикадан, Тлеумұратова Диана, Әбдеков Дамир самбо күресінен, Сламбекова Набира белбеу күресі, Қозбағарова Әсел мүгедектер спорты)

2019 жылы аудан бойынша 10 спорттық ойын алаңдары қайта жөндеуден өткізіледі. Оған аудандық бюджеттен 26,8 млн қаржы бөлінді.

Денсаулық саласы бойынша: Ауданда тұрғындардың өмір сүру ұзақтығы жыл өткен сайын өсе түсуде, 2017 жылы орташа өмір сүру 70,5 жас болса, 2018 жылы 72,1 жасқа жетті.

Елбасының жолдауына сәйкес «Үздік денсаулық сақтау және Дені сау ұлт» ақпараттық жүйелерді біріктіру, мобильдік цифрлық қосымшаларды қолдану, электрондық денсаулық паспортын енгізу, «Қағаз қолданбайтын ауруханаға» көшу бағытында әрбір медицина қызметкерлері жеке-жеке компьютерлермен қамтамасыз етіліп, кешенді медициналық ақпараттық жүйеге қосылып жұмыс жасауда.

Сонымен қатар, Денсаулық сақтау саласы халықтың, мемлекеттің және жұмыс берушінің ортақ жауапкершілігіне негізделген міндетті әлеуметтік медициналық сақтандыру жүйесіне көшу жұмыстары жандандырылуда.

2018 жылы денсаулық сақтау саласына қажетті құрал жабдықтар сатып алуға 101,0 млн. теңге қаржы бөлініп, қажетті құрал-жабдықтар және автокөліктер сатып алынып пайдалануда. Осы ауданға да автокөлік жолданды.

Жаһандану кезеңінде, ұлт тарихының мәдениеті мен құндылықтарын білу, насихаттау, әрі сақтау елді бекемдеудің тікелей кепілі.

«Сыр елі-жыр елі» дегенде, тұтастай Тұран мәдениетін, бүкіл түркі халықтарының өнері мен әдебиетін және көне сарын дәстүрін, Қорқыт бабамыздан қалған мәдени мұраларымызға мұрагерлік ететін Қармақшы топырағы болып табылатындығын айта кету қажет.

Осы бағытта Маврикий Республикасының астанасы Порт-Луисте өткен ЮНЕСКО-ның материалдық емес мәдени мұраларды қорғау жөніндегі комитетінің 13-үкіметаралық отырысында Қазақстанның бастамашылығымен «Қорқыт ата мұрасы: дастан, аңыз және музыка» деген атаумен енгізілген құжат бірауыздан мақұлданып, тиісті шешім қабылданып, тізімге енгізілді.

Атқарылған игі шаралар түркі әлемінің абызы атанған Қорқыт ата бабамызды бүкіл әлемге танытудағы тағы бір қадам деп білеміз.

2018 жылы аудандық бюджеттен 2999,0 мың теңге қаржы бөлініп Марал ишан мазары жөндеуден өтті.

Осындай шаралар Ақжар ауылының құрылғанына 60 жыл және облыс көлемінде Тұрымбет Салқынбайұлының 150 жылдық мерейтойлары өткізілді.

Сондай-ақ, «Рухани жаңғыру» атты бағдарламалық мақаласынан туындайтын «Атамекен» кіші бағдарламасының «Туған жерге тағзым» акциясы аясында ауданымызда өз қаражаты есебінен Бекжанов Зарқұм Сартайұлы Жосалы кентінен құны 12,0 млн. теңге болатын мүгедек балаларды оңалту орталығының құрылысын жүргізуде.

Қай кезде де жастар жалынды жігерімен, айрықша белсенділігімен қоғамның қозғаушы күші болған. «Жақсы жастан шығады» демекші, жас буынның тау қопарар екпіні, толайым күш-қуаты мықты болса керек-ті. Елбасы Нұрсұлтан Назарбаевтың «Қазақстандықтардың әл-ауқатының өсуі: Табыс пен тұрмыс сапасын арттыру» атты Қазақстан халқына жолдауында 2019 жылды «Жастар жылы» - деп атап көрсеткен болатын. Бұл бастама жастарға берілген зор мүмкіндік. Оларға артылған үлкен сенім.

Біздің өңірде де жастар саясаты жақсы жүйеге қойылған. "Қармақшы аудандық жастар ресурстық орталығы" коммуналдық мемлекеттік мекемесінде 6 қызметкер жұмыс жасауда. Мекеме бюджеті 2018 жылы 9,0 млн. теңгені құрады. Аудан бойынша 14-29 жас аралығында – 12 342 жас бар. Жалпы жастар халықтың 22,8 пайызын құрап отыр.

Жастар жылын өткізуге байланысты арнайы «Жол картасы» бекітілді.

Биылғы жылы Төретам кентінде жастар ресурстық орталығы құрылып онда 2 маман жастармен жұмыс жасайды.

Жастардың өзін-өзі басқару жүйесін жетілдіру мақсатында жыл аяғында ауданымызда оқушылар және жастар мәслихаттары құрылды.

Өздеріңіз білесіздер, аудандар арасында алғаш болып жастардың бос уақытын тиімді пайдалануға арналған екі «КОВОРКИНГ» орталығын ашқан болатынбыз. Келер жылы
5 ауылдан осындай орталықты ашуды жоспарлап отырмыз.

Кәсіпкер боламын деуші жастар үшін Қорқыт Ата атындағы ҚМУ-нің «Бизнес-старт» бизнес-инкубатор орталығымен бірлесіп «Стартап-Бизнес» инкубаторы өз жұмысын бастайды, бизнес идеялар байқауы мен жәрмеңкелерін ұйымдастырылып, ауданның жас кәсіпкерлерінің форумымен қорытындыланатын болады.

Бүгін Сіздердің алдарыңызда ауданда атқарылған жұмыстар мен алға қойған мақсат-міндеттерімізді қысқаша баяндап өттім.