Орал қаласы 2018 жыл

Түсінік хат

Бұл бағдарламада физиканың 7-сыныпқа арналған факультативтік курсы ағылшын тілінде баяндалады. Физика пәні теория мен практиканы ұштастыра отырып оқып үйренуге арналған экспериментальды ғылым. Тек мұғалімнің түсіндіргенін тыңдап және кітаптан оқып қана физиканы игеру қиын, тіпті мүмкін емес десе де болады. Сөз болып отырған әрбір құбылысты айқын көру керек. Кейде қарастырлатын құбылысты аса қарапайым түрде күнделікті өмірден көптеп көруге болады, тіпті үй жағдайында қолда бар құралдардың көмегімен оны қайталап жасауға болады. Мысалы, термометр, таразыларды, барометрді және басқа да радиотехника және электротехника құралдарын пайдалану арқылы көп мәліметтер алуға болады. Бұл факультатив курсы Қазақстан Республикасының президенті Н.Ә.Назарбаевтың білім саласына үштілділікті енгізу жоспарының бастамасы болып табылады. Әрбір қазақстандық азамат өз тілін құрметтеп, өзге тілді жетік меңгерген жағдайда еліміздің әлемдік дамыған 30 елдің қатарына енуге жол ашылар еді. Осы мақсатта бұндай курстық бағдарламалар оқушылардың тілдік, техникалық ойлау қабілеттерінің дұрыс дамуына негіз болады.

Біз әр түрлі табиғат құбылыстары әлемінде өмір сүреміз. Қандай да бір табиғат құбылыстарының себебін айқындау үшін, байқап отырған құбылыстың басқа құбылыстармен байланысын табу және оны табиғаттың белгілі бір заңдарына сүйеніп түсіндіру қажет. Сонда ол құбылыстың жұмбақ сыры ашылып, біз олар туралы ғылыми түсінік аламыз.
Курстың мақсаты: 7 сыныптың кейбір маңызды тараулары мен тақырыптары бойынша жалпы түсінік ағылшын тілінде баяндалып, түрлі суреттер, қосымша материалдар арқылы заңдылықтардың ашылу тарихын, күнделікті тұрмыста қолданылуын; физиканың түрлі саламен байланысын бақылай отырып, пән бойынша тілдік құзіреттілік деңгейін көтеріп; пәнаралық байланысты жүзеге асыра отырып, оқушылардың өзге тілде сөйлеу, шығармашылық ойлау қабілетін дамыту.