Физикалық химия пәні. Негізгі бөлімдері

Фармация мектебі

Термодинамика

Дәріскер: Аширбекова Б.Б.

Қарағанды 2021

Физикалық химия пәні. Негізгі бөлімдері

Физикалық химия зат құрылысының заңдылығын, химиялық жүйедегі тепе-теңдікті, тепе-теңдіктегі бір күйден екіншіге ауысу мүмкіндігін көрсететін заңдылықты және химиялық түрлену процесін зерттейді. Мұндағы екі мәселе, атап айтқанда тепе-теңдікте тұрған күй мен осы күйден екіншіге ауысу кезіндегі жалпы заңдылықты зерттеу, физикалық химияның негізгі тарауы болып саналады.

Зат құрылысы — атомдар мен молекулалар арасындағы ішкі құрылыс пен олардың өзара қатынастарын, физикалық және химиялық қасиеттерін зерттейтін тарау. Мұнда молекула геометриясы, молекуланың ішкі қозғалысы мен оған әсер етуші күш табиғаты және сол сияқты молекулалар арасындағы күштер зерттеледі.

Химиялық термодинамика - әр түрлі жағдайлардағы физикалық және химиялық өзгерістердің жылу балансын есептеп, өзгерістердің бағыты мен мүмкіндігін анықтайтын бөлім. Химиялық термодинамиканың көмегімен физикалық және химиялық тепе-теңдіктің негізгі заңдылығы анықталып, температура, қысым, концентрация сияқты өлшемдердің бірі не бірнешеуі өзгергендегі тепе-теңдік заңдылығының құбылысы, түрленуі, қалайша алмасатыны зерттеледі.

Ерітінді бөлімінде еріткіш пен еритін заттардың табиғаты, олардың құрылысы қарастырылады, еру кезінде болатын өзгерістер мен ондағы химиялық реакциялардың ерекшелігі көрсетіледі.

Физикалық және химиялық анализге арналған тарауда — белгілі бір жүйенің жағдайы және оның физикалық қасиеттерінің құрам өзгеруіне тәуелділігін геометриялық әдіспен зерттейтін көп компонентті күрделі жүйелердегі химиялық әрекеттесулер мен теңдік шарты қарастырылады.

Электрохимия - материяның электрлік және химиялық түрдегі қозғалысының бір түрден екінші түрге өту заңдылығын, құрылысы мен электролиттік ерітінділердің қасиеттерін, электролиз процестерін, электрохмиялық элемент жұмыстарын, металдардың электрохимиялық тотығуын (коррозиясын), заттарды электр көмегімен алу әдістерін зерттейді.

Химиялық кинетика мен катализ бөлімінде химиялық реакциялардың жылдамдығы мен олардың молекулалық механизміне арналған жалпы мәселелер, гетерогенді процестер мен олардың жылдамдығына температура, қысым, еріткіш, катализаторлардың әсерлері қарастырылады.

Физикалық химияның жоғарыдағыдай бөлімдер мен тарауларға бөлінуі шартты. Алайда дәл осылайша жіктеу көптеген өзгерістерді оларға тән ортақ қасиеттері бойынша біріктіріп, кейбір жайларды анықтауға, арнайы сипаттауға көмектеседі.