Индикаторлық диаграмманы құру әдістемесі

Диаграмма тұрғызуды біркелкі шкаласы бар көлем координаты (абсцисса) өсінде μ_s масштабын ескере отырып, откамера көлеміне сәйкес нүкте (ОА сызығы) мен цилиндрдің толық көлеміне сәйкес нүктені (ОВ сызығы) белгілеуден бастайды. Қысым координаты (ордината) өсінде де біркелкі шкала орнатып, өлшем бірлігін көрсетеді. Қысым масштабы μ_р мөлшерін индикаторлық диаграмманың биіктігі (р_z) оның табанынан (V_h) 1,5 – 2,0 есе үлкен болатындай қылып таңдайды. Әдетте, μ_р = 0,05 МПа/мм немесе μ_р = 0,1 МПа/мм.

Мұнан соң p – V координат жүйесінде 5-кестеге жинақталған белгілі p_a, p_b, p_c, p_z, p_r шамаларын нүктелейді. Нүктелерді жатық сызықпен қоса отырып, диаграмма тұрғызады. Енгізу және аластау процестері шартты түрде тұрақты қысым жағдайында өтеді деп есептеп, р_а және р_r шамасына сәйкес түзу сызықпен бейнелейді. Сондай-ақ диаграммада бензин моторы үшін атмосфералық қысымды р_о, ал дизель үшін үрмелеу қысымын р_к көрсетеді.
7 Мотордың сыртқы жылдамдық сипаттамасын құру және талдау
7.1 Жалпы мәлімет

Мотордың негізгі көрсеткіштерінің (N_e, M_e, G_от, g_e және т.б.) айналым жиілігіне сай өзгеруін жылдамдық сипаттамасы деп атайды. Егер мұндай сипаттама бензин моторының дроссельдік қақпақшасы толық ашылған немесе дизельдің отын айдағышының реттегіш тетігі (рейка) шектегішке тірелген, яғни циклдік отын мөлшерінің максимум шамасына сәйкес (әр нүктеде) анықталса, ол мотордың сыртқы жылдамдық сипаттамасы (СЖС) болып табылады.