Семестрлік жұмысты жазуға арналған әдістемелік нұсқау
Ұсынылып отырған семестрлік жұмыстың тақырыптары ҚР білім және ғылым
министрлігі бекіткен «Әлеуметтік – саяси білімдер модулі: әлеуметтану, саясаттану» оқу
пәні бағдарламасына сәйкес дайындалған. Пән бойынша студент үш семестрлік жұмыс
жазады және жұмыс жазбаша (электронды) түрде дайындалады.
Семестрлік жұмыстың мақсаты
– әлеуметтану және саясаттану ғылымдарының
теориясы мен әлеуметтік топтардың, жіктердің, әлеуметтік саяси институттардың,
қоғамның жәй-күйі және нақты өзекті әлеуметтік-саяси мәселелер бойынша білім өрісін
кеңейту және толықтыру. Өз бетінше талдау жасауға, дереккөздерімен жұмыс істеу
қабілетін қалыптастыруға, шығармашылықпен ойлауға көмектесетін, ғылыми және
практикалық міндеттерді қоюға және шешуге жәрдемдесетін дағдылар мен іскерлікті
меңгерту. Сонымен қатар студентті ғылыми жұмыс орындаудың алғашқы шарттарымен
таныстыру болып табылады.
Семестрлік жұмыс арнайы бекітілген кестеге сәйкес орындалады. Семестрлік
жұмысты орындау мерзімі: бірінші жұмыс үшін 5-апта, екінші жұмыс 9-апта, үшінші
жұмыс 13-аптада өткізіледі.
Семестрлік жұмыстың құрылымы
мынадай бөлімдерден тұрады:
- титулды бет(Б қосымшасы);
- жоспар;
- кіріспе;
- негізгі бөлім;
- қорытынды;
- пайдаланылған әдебиеттер тізімі.
Студент нұсқаулықта семестрлік жұмыстың тақырыбына сәйкес ұсынылған
жоспарды
негізге алып, жұмыс жасауы тиіс.Бір тақырыпты топтың eкi студентінің
таңдауына жол берілмейді, әр студент жеке тақырыптар алуы тиіс (А қосымшасы). Еркін
тақырыпты таңдау немесе жұмыстың жоспарын өзгерту тек оқытушының келісім беруінен
кейін ғана жасалынады.
Кіріспеде
тақырыптың өзектілігі айқындалып, мәселенің зерттелу деңгейі (отандық
және шетелдік ғалымдар зерттеулері) қарастырылады. Жұмыстың мақсаты мен міндеттері
нақты көрсетіледі.
Негізгі бөлім
жоспарға сәйкес жазылады. Негізгі бөлімнің 2 немесе 3 тараудан
тұруы мүмкін. Бөлімде тақырыпқа қатысты негізгі пікірлер мен тұжырымдар,
проблемаларнақты айқындалуы тиіс. Негізгі бөлімнің мазмұны тақырыпқа және жоспарға
сәйкес болуы қажет.Егер тақырыпқа байланысты шынайы өмірде орын алған,студент өзі
куә болған оқиғалар болған жағдайда,оған мысал келтіріп, нақты деректермен дәлелдей
алатын болса, жұмыстың құндылығы арта түсетін болады.
Қорытындыда
жұмыстың нәтижелері беріледі. Автор таңдаған проблеманың мәні
мен мазмұнын және шешу жолдарын нақты ашып көрсетуі тиіс. Кіріспеде көрсетілген
жұмыстың мақсаты мен міндеттерінің орындалу деңгейі көрсетіліп, әр бөлім бойынша
қысқаша тұжырымдар жасалады, студенттің практикалық ұсыныстары мен ой
қорытындылары, көзқарастары беріледі.
Пайдаланылған дереккөздер тізімі
оқулық, оқу құралдарымен шектелмеуі тиіс.
Семестрлік жұмысты жазу барысында студенттің тақырыпқа қатысты жарық көрген
ғылыми-зерттеу еңбектерін кеңінен пайдалануға басымдық бергені жөн. Олардың
қатарында монография, ғылыми мақалалар, жинақтар, нормативті құжаттар,
мамандандырылған «Социологические исследования» журналының мақалалары мен
статистикалық мәліметтері болуытиіс. Дереккөздерге сілтемелер жасау барысында назар
аударыңыз:Жамбылов Д.А. Саясаттану: Оқулық. - 4 басыл., өзгеріс. - Алматы: Жеті
жарғы, 2008. – Б. 24-25; Егер журналдағы ғылыми мақала болса: Ақжанов Б. Қоғамдық
сананың жаңғыруы: қазақстандық бірегейлік пен бірлікті нығайту және дамыту //Ақиақат.
- № 11, Қараша 2017. С. 30-32.; Электронды деректі пайдаланғанда мәтіннің авторын,
тақырыбын, жарияланған күнін және электронды мекен жайын жазу қажет. Мысалы:
Ахметов. К. Саяси сайлаулар туралы. Эссе. 15.08.2018 //http: www. referat.
ru/pub/item/23775.
Семестрлік жұмысты рәсімдеу тәртібі
. Семестрлік жұмыстың жалпы көлемі 15-
20 бет. Мәтіндік редактор Microsoft Office PowerPoint (презентация), шрифт Times New
Roman. Стандартқа сәйкес орындалуы қажет.
Семестрлік жұмыс келесі негізгі сапалы критерилер бойынша бағаланады:
1) Тақырыптың өзектілігі, зерттеудің мақсаты мен міндеттерінің нақты айқын
көрсетілуі
2) Материалды беруде өз бетінше жұмыс жасауы, бір ізділікті және логикалық
жүйені сақтауы
3) Талдаудың тepeңдiгi мен негізділігі және алынған нәтижелерге дәл нақты
түсініктеме беру
4) Тақырып бойынша пайдаланылған әдебиеттердің саны мен жеткіліктігі
5) Семестрлік жұмыстың безендірілуінің талаптарға сәйкес болуы.
Студент семестрлік жұмысты міндетті түрде оқытушының корпоративтік
электронды поштасына жіберуі тиіс.
