Орталық мешіт – жамиғат игілігіне

Құрметті жамиғат! Сәрсен­бінің сәтті күні көптен күткен жаңа мешіттің есігі айқара ашылғанын көріп, қуанышқа бөленіп тұрмыз. Естеріңізде болар, 2009 жылы Құрбан айтта мешіт намазхандары қаламызға жаңа мешіт салсақ деген тілек білдірген еді. 2010 жылы мамыр айында осы жерде мешіттің алғашқы қадасы қағылды. Сол жылы шілде айында құрылыс басталып кетті. Бұған бюджеттен бір теңге де жұмсалған жоқ. Барлық жұмыс демеушілердің, қалталы азаматтардың, халықтың жинаған қаражатына атқарылды. Осы заманғы ең жақсы материалдар қолданылды. Осыдан екі күн бұрын облысымызда жұмыс сапарымен болған Елбасымыз Нұрсұлтан Назарбаев мешітке ар­найы атбасын тіреп, оның ішкі-сырт­қы безендірілуіне жақсы баға берді. Сөйтіп, Елбасымыз жаңа мешітті ашып, батасын берді. Бұл мешіт тек қана Қазақстандағы ғана емес, Орта Азиядағы ең көркем, әрі үлкен мешіттердің бірі. Оның іші қазақи ою-өрнектермен безендірілген. Оны қазір өздеріңіз көзбен көре­сіздер. Осы мешітті салуға ат са­лыс­қан барлық азаматтарға, жұмыс­шыларға, қаржылай көмек берген жұртшылыққа зор ризашылық біл­діреміз. Бұл Алланың үйі халықты бірлікке шақырып, жастарды иман­дылыққа тәрбиелеп, рухани азық беретін орын болады деп сенеміз. Жаңа мешіттің іші нұрға толып, қайырлы мекен болсын. Құт береке әкелсін, – деді облыс әкімі өз сөзінде.

Бұдан кейін облысымызға белгілі ең­бек ардагерлері Жарылқасын Би­кенов, Тілеубек Зейнешев және Қазақстан мұ­сылмандары діни бас­қармасының Қара­ғанды өңіріндегі өкіл имамы, Орталық мешіттің бас имамы Рашид қажы Алпыс­баев құттықтау сөз сөйледі. Осыдан кейін жиналған жамиғат үшін мешіттің есігі ай­қара ашылды. Аруақтарға арнап дұға оқылды. Намазхандар сәлем намазын оқыды.

Бар-жоғы бір жылдан асар-аспас уақытта салынып, пайдалануға берілген Қарағанды қаласындағы Орталық мешіттің құны 1,7 млрд. теңге болды. Бір мезгілде 4 мың адам намаз оқи алатын бұл мешіт үш қабаттан тұрады. Бірінші қабатта неке қию залы, 330 орындық асхана, жуынатын бөлмелер және басқадай техникалық бөлмелер орналасқан. Екінші қабатта 3 200 орындық ерлер на­маз оқитын үлкен зал, киім ілгіш, мешіт қызметкерлері отыратын және дәріс беретін бөлмелер орын тепкен. Үшінші қабатта 800 орындық әйелдер намаз оқитын зал бар.

Мешіттің төрт мұнарасының әрқайсы­сының биіктігі 49 метр. Үлкен күмбездің диаметрі 12 метр, кіші күмбездердің диа­метрі 8 метрден. Мешіттің іші қазақтың ою-өрнектерімен безендірілген. Құранның сүрелері ойып жазылған. Терезелері осы заманғы көркем-витраждық техникамен жа­салып, бірінші рет қолданылып отыр. Оның қоңыр түсті шынылары жаз кезінде күннің ішке түсуін тежейді. Мешіттің іші мен сыртын әсемдеуге еліміздің барлық түпкір-түпкірінен 70-тен астам шебер шақырылып, олар өздерінің өнерін аямады. Ғимараттың темірден, шыныдан, керамикадан жасалған барлық әсемдік бұйымдарын жергілікті ше­берлер жасады. Мешітті салу кезінде Арабияның, Малайзияның ең әсем мешіт­терінің үлгілері алынды.

Сонымен, Қазақстан Тә­уелсіздігінің 20 жыл­дығы құрметіне пайда­лануға берілген жаңа ме­шіт қала тұрғындарына үл­кен сый болды. Көкпен ті­рескен көк мешітті көр­ген жұртшылық дән риза болды.